Knigom po glavi…

Gda meni padne kmica na oči, pak onda vidim da je vrag pobral šalu, došle je vreme da se nekaj poduzme.
Pak sem rekel – treba je delati Projekta – jer ovak više nemre. A gda bi imel Projekta, mam morem složiti bar tri radionice i bar jenoga okruglog stola, makar bil i na četiri vugla. A moči je složiti i tribinu, makar ne znam kaj to je.

Sad bute mam pitali a kaj me je to tak strefilo da još ni sad nisem pri sebi. Jeee, to je dugačka priča pak to nemrem povedati tak, same na jenput.

Bile je čuti da sme mi zemla znanja, a onda sem negde pročital da još uvek imame pune nepismenih, pak sem si gruntal kaj bi ja poduzel da se to popravi. Da ne bi mislili da sem ja mam štel postati poduzetnik, ne daj Bože. Ja sem se hitil na kulturu, pak sem složil knigu da bi i ti nepismeni imeli nekaj za čitati. Pak bi se morti ta sramota popravila.

Ne da bi se ja falil, ali kniga mi je dobre zišla. Del sam vnuter i slike da bi bila više onak kak slikovnica, a po skrivečki sem podvalil i moje filozofsko mišlenje  i se je bile nekak, onak na nivohu Crvenkapice. Vnuter sem zakamufleral i naravovučenje, onak skroz na skroz pedagoški kak Bog i struka zapovedaju.

Ja sem svoje složili i dale je bile na gradskoj kulturi da se stvar realezera. Ali, kaj god, ta gradska kultura se pokazala skroz nekulturna pak je povedala da neda peneze.
Moram priznati da sem bil fest tužen, bar kaj se početka dotikavle, a onda sem se rasrdil i zaklučil da me same moj Projekt more spasiti. Ali ne same mene, nego i celokupnu kulturu v Lepoj našoj.

Ideja mi je blesiknula v glavi onoga časa gda je naša uvažena Varoška knižnica, osnovana A.D. 1864.,  donesla odluku da i penzioneri moraju plačati članarinu, pak sem si ovak gruntal: knigu sem složil v nakladi od 3 komada ob svom strošku.  Jenu sem poklonil, jenu sem poslal jenom ženskom akademiku da bi mi morti napisala svoje mišlenje o knižički, ali mi je odgovorila da si je baš ftrgla nogu pak joj je ni do pisanja hvalospeva, pak je same napomenula da je knižička “hercig”, a jena je ostala meni. Napisal sem ja još i dve druge pak mi je sinule da bi to več bila biblioteka, a ta bi se moja biblioteka mogla i službene zvati “BIBLIOTEKA KAJ GOD”

Knigu je ni moči prodati ni za skroz male peneze, ali ne zate kaj ljudi ne bi čitali, nego jednostavno – nemaju penez. A sad, gda moraju platiti članarinu Knižnici, zakaj ih i ja ne bi včlanil v moju “BIBKIOTEKU KAJ GOD”, bar penzionere kak sem i sam. 50 kuna su ni nekakvi penezi, a moja bi knižička išla od jenoga do drugoga pak bi se nekaj i nabrale. Mislim penezov. A stvar je skroz na skroz jednostavna; 5o kuna članarina, a knižičku posudim badav, a čim je nekaj badav, to bi i druge zaintereseralo.

Ali, sad tek dolazi moj Projekt. Nikaj na pamat, niti onak v hodu. Nauka, same nauka i inovacije moru nas gurnuti napred.
Kakti prvo, treba je istražiti tržišče. Tu imam nameru postaviti pitanja, neka i samome sebi, a tek gda dobijem i sumeram odgovore, treba je iti v akciju. A ne kak guska čez meglu, čak i če je o kulturi reč.

Kak je i red, počel bum prvo sam od sebe, pak si bum postavil:

1. pitanje: Šte me ima najviše rad, pak me voli, ceni i poštuvle?
1. odgovor: JA! I same JA!

Več na početku šlaprček. Ali dobre je znati. Nikak nemrem sam sebe včlaniti v moju Biblioteku jer gda bi se včlanil, moral bi zeti peneze sam sebi pak bi opet bil vriti. Ili na nuli, če bi si ih vrnul. No dobre, idemo dalše:

2. pitanje: Šte me ima male menše rad i same male menše voli, ceni i poštuvle?
2. odgovor:  Moja Pepica i mali Pepek, moj naslednik! 

Pak promašaj. Ni njimi nedam peneze da bi ih včlanil, pak da si ih opet vrnem, a knižičku su tak i tak več pročitali besplatno. Još su me i našpotali kaj sem tak nori da se bavim glupostima, a ono još gorše vam nečem ni povedati. Sad si bute mislili da se bum ja mam predal, ali – ne! Nedam se ja tak šale pokolebati jer sem trde glave a i nikaj me nemre iznenaditi. Pak bum nastavil:

3. pitanje: Kulike imam kolega, prijatela i prijatelica s kojimi sem si dober a ti bi mogli biti   potencijalni? (Ovo potencijalni sem mislil članovi, jel onak kak ste vi mislili, oni stareši muški več odavna nisu.)
3. odgovor: Takvih je pol/pol. Pak če zemem da ih je sih skup pune, a polovicu hitim kak nepodobne, zide da bi ih još dosti i ostale. To več diši na dobre. Da bi znal točni broj, moral bi zračunati, ali nemrem sad mam jer se potrošila baterija pak mi Digitron ne dela. Nego, idem ja dalje z pitanjima, makar mi sad ova zglede nekak hudo. Ali, istini navek treba gledeti v oči, pak kaj bu, bude bilo.

4. pitanje: Kulike je onih koji me ne vole, preziru i omalovažavaju, koji mi se podsmehuvlu, pak bi me najrajše na cesti zgazili čak i gda idu pešice? (Ipak nisem štel reči koji me mrze).
4. odgovor: A, joooj, zišle je da je takvih skorem najviše. Pak sem se zabezeknul, presenetil, a mučke i splašil. A gda sem si i male zgruntal, je zišle da vrag i ni tak črni kak na prvi pogled zgledi.

---

Pol od tih, dopodne mrze sami sebe a popodne i ostatak sveta. Pak sem ih mam apstaheral. Od onih kaj su ostali, jena četrtina v životu ni pročitala ni jenu knigu, pak teško da bi ih mogel včlaniti. Za njih sem predvidel okrugli stol na četiri vugla, ali to bi več išle pod poglavlje – edukacija.
Ostala je još jena četrtina, a na te bi i mogel računati. Nije da oni baš vole čitati, ali buju morali, če me oču kritizerat. Morti i ne buju se pročitali, nek onak, na preskokce, ali i da nisu čitali, oni bi rekli – od kad taj nepismeni slaže koje kakve knige, kultura bi mogla dojti v još vekšu  krizu, nek kaj je ona koju nam je složila recesija v privredi.
Jeden menši del od te četrtine od četrtine, bi se mogel včlaniti brez onih krajnih, niskih pobuda, jednostavne kaj bi se nasmejali, mahnuli rukom i povedali – naj piše, saki bedak ima svoje veselje. A kaj se mene dotikavle, i tu su mi nekakve šanse.

Ima još jena grupa na koju bi mogel ozbilno računati. To je naša stručna i kulturna javnost, koja bi se po potrebi posla trebala učlaniti. Sad, ruku na srce jedan del te javnosti dojde same gda je domjenak, kak se to denes veli, pak zamera če štrukli nisu bili dobri, il su prefletne nestali, a kulturu vide ili ne vide, da ne povem da i ne razmeju. E, ti bi se učlanili da buju kulturni. Sikak, veliki plus za mene. Ostali su mi još oni fakat kulturni i kompetentni i na njih sigurno računam. Sad oni postavlaju pitanje koje glasi:

5. pitanje: Kam ide naša kultura?
5. odgovor: Nikam, jer je ni penez, a one mele kaj ih i je, je preraspodeleno za dobrobit i napredak pučanstva čez podzemne aktivnosti u izgradnji bolše budučnosti.

Nije baš da je i se  tak črne kak zgledi, jer najde se i nekaj kaj je od interesa naše male Slobodne i Kralevske Varoši Križevca, a za takve Projekte bumo dali i zadnje peneze. Tu je same sporne šte o tom odlučuje.

Bojal sem se kaj bu kompetentna kulturna kultura rekla o mojoj knižički, i nisem mogel verovati gda su me pofalili. Sikak, metnuli su mi na znanje da oni znaju da to ni onak kak da ni napisal M. Krleža, ali ja tak nisem ni štel pisati, a nije da ne bi znal. Složil sem onak, više u narodnom stilu, a če mi se omeknula nekakva falinga, oni nepismeni to ne bi ni vidli. Nazdnje, se je dobre zišle. Ove kulturne, se bi mogel učlaniti.

Ostala mi je još jena velika grupa koja ni sama ne zna kulike je važna. A to su penzići. Gda bi se si ujedinili, pomeli bi se kandidate, skočili na vlast i vladali do svoje smrti na koju, nek mi dragi Bog oprosti, i ne bi trebalo dugo čekati.
V toj grupi sem se posebno setil jene kolegice z kojom sem skupa zbavlal nauke, pak mi je ona i školska i penzionerska kolegica. A jenput mi je povedala da bi ona i zadnje peneze dala za – knigu. Pak ih je čudo i dala.

Za njih sem složil skroz jednostavno:

6. pitanje: Kakve knige najrajše čitate, če čitate, a povečte i če su vam knige preskupe?, na koje sem dobil i
6. odgovor:  One onak simentalne, kaj bi čoveka vrnule v mladost, v ona nenarodna vremena gda je narod imel kaj za jesti, pak je čak išel v Mađariju, onak posle obeda, na kavu. A oni su onak srameči, kakvi su bili, išli k nami  sa Trabantima, i duge bili sretni kaj su vidli “zapada” i blagodati civilezacije.

Još su i nadodali da su knige ni preskupe, same oni nemaju penezov pak se rađe včlane v Knižnicu i čitaju mukte, ali su im sad i to v  doba recesije fkratili.
Gda sem to čul, bil sem tak zadovolen da mi je skoro suza kapnula na oko, jer sem znal –vi ste moji i Božji.
Če tome dodam, a to je poznato, da redovito plačaju čim dobiju svoju crkavicu od penzije, morem biti siguran da buju došli z kešovinom i rekli – ja bi se vučlanil, ili vučlanila. Morti su i načuli da ja pišem baš takve knige, a oni bi morti i rekli – on je naš, pak kaj god da nažlambra, bumo mu oprostili.

Neki dan sem i ja dobil crkavicu pak sem kupil četiri ganc nove baterije i Digitron je proradil kaj da je novi. Ne bi vas ja štel maltreterati z statistikom, ali sem zračunal da bi mogel računati na bar 150 članova moje BIBLIOTEKE KAJ GOD, a če uzmem u obzir i statističku pogršku od 5%, bum još smanjil za 7.5 pa bi zišle da ih bu  sih skup 142.5 komada članova. Ovih 0.5 bum ostavil če bi se jeden morti još kolebal, pa bi zišlo da je ni sim ni tam.

Još me je zabrinula same organizacija distrebucije knigice. Doduše, včlanil bum ih se najenput, ali čital bu jeden za drugim, gda onaj pred njim vrne.  Dobre, kultura bu čitala fletneše, pak bu išle po redu,  ali če posudim kojem penziču, pak on zatrokera, mogle bi biti vraga. I kaj sem sad čineči?… Nikaj, treba je pobrati peneze, a delše bume vidli.

Male sem se informeral, a i sam sem zaklučil kaj je to “tribina”. Pak je zišle da je to tam  gda igraju nogometa, a to je prav za prav gledališče. I mam sem zaklučil da mi toga ne treba. Tam se same mlate, a i policija ima posla, a to z mojom kulturom nema veze.

Ne bum delal ni okrugloga stola, jer je i ovak zišle da bu članova moje  Knižnice BIBLIOTEKE KAJ GOD više nek gda bi knigicu i dal štampati. Prodal bi morti 20, 25 komada, a ovak, ni Varoš ni ja ne bume imeli stroška a čitalačka bu publika došla na svoje. A fakat, najviše oni, nepismeni.