Je bile čuti da budu v Varaždinu delali Špancirfesta pak sem si gruntal morti bi mogel zeti moju Pepicu kaj bi se prošpancirala a ja bi mam videl kaj to je. Vami bum mam priznali, su trebali iti naši Potkalnički plemenitaši kaj bi tancali, a njih videti v Varaždinu bi bile kak melem za oko.
– No, kaj je Pepica, bume išli v Varaždin na Špancirfest? – pitam ja nju onak kak da i nisem preveč zainteresiran.
– Bi mogli – odgovori ona meni – ali same v četrtek gda naš mali Pepek nema slobodne aktivnosti. I da znaš! Alkohol, 0,0 promila, a mobitel nečem ni čuti ni videti pri tebi.
Mam ste pogodili da je Pepek naš naslednik i bormeš ponos našeg zajedničkog živlenja. Veliju da je lepi kak mu je i tatek a pameten kak mu je i mama.
Kak dani fletno idu, je četrtek mam došel a ja si pak gruntam; če ideme prek Kalnika, bume se fest zdroncali kad nišče neče zasfalterat onih osem kilometrov kaj su još stari Rimljani napravili podlogu. Si same obečavlu a ja velim – ideme prek Koprivnice.
Je bile lepo sunčano popodne, pak sme krenuli. Pelam ja onak stiha, baš kak novi saobračajni propisi i zahtevaju i taman gda sme prošli Lepavinu, zaruži meni nekaj v žepu a čez drob me tak preseče da sem skoro z čelenkom vudril retrovizora a moja Pepica zakriči:
– Ne diraj! To je 500 kuna, a morti te i zovu oni kaj sme im dužni peneze, pak je bolše da se ne javiš.
Je, tu je ona imela prav, a gda sem malo došel k sebi ni mi bile jasno zakaj se Lepavina zove – Lepavina? Morti zato kaj imaju lepe gorice ili možda kaj imaju dobra vina? No, sejeno. Kak sad stvari stoje budu tržili – razglednice.
Najemput, glasi se moj mali Pepek kojeg do sad ni bile čuti: – Tatek, je morti naš avtek potrgani gda nas tak polefko pelaš?
– Te ni sinek. Ja ti same poštivlem propise. Če piše 30, ja vozim 30. Ak veli ne preticati, ja ne pretikavlem. Nekak mi se vidlo da Pepek baš i ni bil preveč zadovolen odgovorom a i ja sem videl da je več trifrtalja vure prešlo a nikak da dojdemo v Koprivnicu. No, pak se mi Križevčani v Koprivnicu baš i ne žurime iti osim, če nismo v horizontali ali nas onda pela črleni križ.
Na križenju sem se zvrstal levo, kak je kažiruka kazala, prema Varaždinu. Kak je bilo proščnje v Ludbregu, bormeš je na cesti bila gužva. Na tabli piše 40, a ja pelam 20 jer je saki čas pred nami biciklin. Pak jenoga zaobidem a vlovil sem druga dva…
Bogu falim kaj sem išel dve vure raneše i nekak na knap oko šeste vure je bile videti Varaždina. Sem bil v brigi kam se bum sparkeral, ali sem našel mesto pri vartogascima pak sem mam rekel – je to i dobro če se stari kramp vužge kaj je sav zakuhal od tulikega puta.
Gda se moja Pepica vrne v svoj zavičaj, mi nekak zgledi kak druga peršona; je nekak veseleša a kak da joj i z oka nekšna iskra blesikne. Taj čas sme pronašli Trg i binu gdi su moji plemenitaši trebali tancati. Ja se mam otpravim plemenitom Precedniku kaj bi se pozdravil, a Pepica zakriči: – Gleč Jožek, pak je Amalija več došla z malom Jacikom, su tam na tribinama. Idi Pepek fletno, buš tecu kušnul, ali naj se mam z Jacikom karati.
Sem bolše pogledel pak i ja vidim veliko gledališče a, bi rekli, polovica su familija. Pak dok sem se z simi ispozdravlal i skuševal je prošlo pol vure pak je program krenul. Je to bila milina za gledet; varaždinske pucičke v dugimi kiklami, baš kak negda. Pak i dećeci v starinskoj obleki a jen malo vekši je čak imel i periku, onak sedu, z nacifranim loknecima. Naši Potkalnički plemenitaši su ni bili mam na redu kaj bi tancali pak su stali kraj bine. Bormeš su zgledeli skroz barokno. A tek deklice; i one su imele starinske loknece, onak pri čelenki zaglađeno prema gore, pak onda si cure prema dole, a če bi curička malo obrnula glavu su igrali gore-dole kak federi. A držanje – pravo plemenitaško; glavu gore, ciceki vun a osmeh kak da gledim Monalizu. A tek oprave? Same svila i kadifa. Dvajsti pet metrov materijala v sakoj pa se to nafaldano, buč-buč rukavi pak čipke i kojekakve špagice, onak zlatne boje. Na glavi kruna, v vuhima veliki minđuši a oko vrata biseri i drago kamenje. Je, sem si mislil, imamo mi kaj za pokazati. Su tak mislili i slikari, pak su lupali na kipec em spreda, pak odotraga, pak jenu samu, pak dve skup. A dečki su se same smeškali jer su znali kaj pod rukom držiju. Taj čas tu se stvoril i pajdaš Ivek kaj je z njimi došel pak je i on lupal na kipec se kaj je stigel kaj bi morti bile materijala i za naše cajtunge.
Onda je zaigral manuet pak se plesna skupina Potkalničkih plemenitaša našla na bini. Pak su se plemenitaši plemkinjama naklonili, prijeli ih za ruke i onda su delali takšne figure kaj je ni za verovati da je to negda bilo zapraf. A ne kak denes, ne znaš šte s kim tanca i zakaj. Saki se sam trese na svoj kraj a bormeš je dečko curu ni ni videl s kojom je tancal. Na kraju je publika fest pleskala a je nebum rekel da su bili najlepši i najbolši jer bute vi rekli da nisem pravičan kad sme si naši.
Sad sem se vrnul familiji, a oni su rekli da si skup ideme na Korzo pak si bume nekaj spili. Gda sme se došpancerali, sme spojili četiri stola kaj bi si stali na jenu vrpu a ja sem naručil kavu radi 0,0 promila. Pepek i Jacika su pili nekšnega soka a moja Pepica si je sa sestrom spila pivo onak, pol na pol. Muški su mam rekli – litru i vodu – jer su promile ignorerali. A ja, gledim taj svet pak se zmislim sih onih lepih uspomena pred 40 let gda sem hofiral mojoj Pepici a ona se je delala kak da joj ni stalo. Smo se i onda špancerali gore-dole, a Varaždin je bil lepi kak i denes. Došel je k nami i pajdaš Ivek kaj se je vrnul z Staroga grada kam je išel plemenitaše još koji put vudriti na kipec.
Taj čas sem zagledal dve domače pucke kaj su na sebi takaj imele starinsku manduru. Su bile tak lepe kaj sem ih mam prispodobil sa našom «najplemkinjom 2004.», pak velim ja pajdašu Iveku, onak stiha:
– Čuj Ivek, bi ti mene vudril na kipec z onimi dvemi lepimi curičkami, če bi one štele?
– Pak te bum vudril – odgovori Ivek – same će budu štele.
A ja ravno k njimi i pitam: – Pucke, bi se vi štele z menom vudriti, onak na kipec, kaj bi meni bile onak, kak uspomena?
Ona z velikim starinskim škrlakom sa vragolasto nasmehnula a takaj i ona druga je pokazala dobru volu. Pak ona prva reče:
– Zakaj ne? Denes su naš grad i naša srčeka širom otprta za naše goste.
Pajdaš Ivek blesikne jenput, pak još jenput, pak veli za saki slučaj još jemput, a meni je došla kmice na oči. Je li je to bile od blesikanja ili kaj su me dve lepotice držale pod ruku, sem ni znal. Lepo im se zafalim, pak onak stiha napomenem ja mojoj Pepici: – Si vidla, tak se dela turizem. Kak su se curičke lepo smejele a ne kak one naše dimov; te glediju kak da si im japu vmoril.
– Mulec jeden stari, nek kaj da su se smejele, mam čim su te vidle.
Je, tu je moja Pepica pokazala svojega zmijskog jezika, ali nisem smel pokazati da me je spekla, pak sem prešel preko toga. Dalje sem užival gledeči pak gda je društvo reklo još litru i vodu, ja sem naručil još jenu kavu i mineralnu. Gda se i to spilo, a razgovori su došli kraju, je bile rečeno da se još ideme špancerati. Kroz tu gužvu stigli sme do štanda na kojem je bilo videti da tu ordinera gradski notarijuš. Ja sem se mam pofalil kak sem varaždinski zet, kaj bi morti imel nekšne privilegije jer gda je zakon v pitanju, nigda se ne zna.
– Pozdravleni i dobro došli – glasi se nami notarijuš, ljudina od jeno 130 kg pod velikim škrljakom v kojega je bilo zataknuto veliko pero. Brkovi i brada, visoko čelo i oštri pogled govorili su da je to učena glava koja zna same za red i zakon. Njegov pomočnik je odmeril celo društvo od glave do pete, pak notarijuš priupita: – Bi prosil, a koja je milostiva vaša bolša polovica?
– Pak Pepica, kaj je ni videti na njoj da je rođena Varaždinka – odgovorim ja notarijušu, onak malo uvređeno.
– Je, bilo je videti, ali red i zakon se moraju poštuvati. Za zeta, se je v redu. On je tam doma gdi mu je žena rođena. Ali, milostivi Pepici treba delati novog ausvajsa.
– Pak kaj set vi nori, gospon notarijuš? Pak je ona domača.
– Nek kaj! Je bila domača, ali je odišla a mi puce ne primamo nazaj. A gda je več došla, moramo delati ausvajsa sa sim generalijama.
Sad su najemput si počeli kričati, moja Pepica se smrtno uvredila, familija je počela terati dokazni postupak da je ona ipak Varaždinka a mali Pepek joj se vlovil za kiklju i počel je bečati. Teta Amalija je rekla da je to sramota a meni se stalno štucalo i nekak me teralo na smah. Onda se je glasil i šogor Zvonimir pak je rekel da je to birokracija a z njom bolše ne imeti posla, pak sem si i ja gruntal, morti i je tak, pak velim ja notarijušu:
– Dobro. Delajte ausvajsa, kaj košta da košta. Nek bu se po paragrafu. I bormeš se on primil posla i počne onak cifrasto ispisivati generalije od moje Pepice. Pak su ju morali vudriti i na kipec, a notarijuš je nekak stalno lukal na mojeg Pepeka koji se je još držal mami za kiklju. Kad je zbavil svoj komplecerani posel pove:
– Evo, je gotovo. A dal sem vam i popusta pak smo za iste peneze deli k milostivi i dečeca jer je on ni kriv kaj se rodil v Križevcima.
Dok je familija zbrajala peneze kaj bi notarijušu podmirili računa, ja sem otišel do varoškoga kovača kak bi zbegel da i ja moram nekaj nadometnuti. Sem čul da stalno luplje po nakovnju pak da vidim kaj dela. Ali nisem prav ni zagledal, a več je Pepek bežal k meni a v ruki je držal nekšnega papera pak mi veli:
– Glečte tatek, smo mamica i ja dobili ausvajsa na kojm piše 1728 pak sad moremo iti kam god očemo.
Po malem se skupil i ostatek familije pri kovaču, a kak sem ja več znal kaj se tu dela, sem im objasnil:
– Vište, tu kovač kuje varaždinske zlatnike pak si bum i ja jenoga otkoval – smo se dogovorili.
– Je, pak naj z sebe delati norca – mam se umešala moja Pepica – pak za taj posel je treba biti muž, a ne škarniclin kak si ti. Je tu bat od dvajsti pet kila, a ti Jožek /tak me zove gda oče reči kak sem mali/ si v životu ni digel vekšega tereta kak je žlica.
Babski jezik more vu mene natirati toliku snagu da sem mam pobesnil, i zgrabil kladivca. Kak je majstor videl da tu vrag šalu bere, je počel skidati svojega kožnoga fertuna pak veli:
– Zemite, kaj bi zgledeli kak pravi kovač jer je videti da ste vi čovek kaj se razme v posel.
– Si čula, odbrusim je mojoj Pepici, a vi ste mam pogodili čiju glavu bi ja najrajše skoval na tom nakovnju. I, pripaše meni majstor fertuna pak ja nadodam:
– No dobro! Onda mi dajte još i vašu kapu, pak bum zgledel fakat kaj pravi kovač.
– Nek kaj, buš zgledel kak pravi norc, ali baš mi je drago ak bum vidla da i ti jemput nekaj delaš. A mogel bi gospon Ivek to i na kipec vudriti kaj bi imel dokaza da si nekaj delal.
I gda je moj bes bil na vrhuncu, majstor je naštimal alata, je zemam bat, i vudrim kak nigda v živlenju …
Zlatnik skoči vun pak ga majstor zgrabi, zaškilji, pak ga obrne, i onak stručno veli:
- Je … , dobre, same malo v šrek – pak onda on naštima alata, zeme bat i vudri kak vrag grešnu dušu, a drugi zlatnik skoči vun. Pak onda zeme njega, pak zaškilji kaj bi ga bolše videl i onda sav v čudu promrmla: – Bormeš je i ovaj v šrek – reče onak stiha, kak da sam sebi nemre poverovati. Onda se zamisli i veli mojoj Pepici:
– Nemrem verovati da mi je ovak mali muž mogel strgati mašinu za delati peneze.
Si su se nasmejali a meni je takaj se bilo nekak smešno. Smo se z majstorom kovačom lepo pozdravili a on nam je poklonil obodva zlatnika jer su bili falš proizvodnja.
Pajdaš Ivek je rekel kak je se lepo vudril na kipec i da ga baš zanima kak bu to se skup zgledelo. Raspoloženje se nekak popravilo pak je pal predlog da se još ideme špancerat i čez vuličku sa starim zanatima. Moj mali Pepek je bil na čelu kolone z ausvajsom v ruki, mala Jacika je lizala sladoleda a teca Amalija je rekla da oče jesti nekšnu gibanicu, jer je kakti domača. Meni je pak stalno bila na jeziku ona popevkica «Ja sem varaždinec …» ali sem malo trokeral jer mi se stalno štucalo.
– Ja bi si spil još jenu kavicu ak ste i vi za još nekaj popiti – predložim je društvu a onda se oglasi šogorova bolša polovica, onak tiha ženica, kaj je do sad same čkomela:
– Joža, pak ti baš i ne bi smel, če buš familiju doma pelal. Si dosad spil dve Špancirkavice a one su ti bormeš sa medenom rakijom pak si zato bolše volje.
– No krasno – plane moja Pepica – sad bumo još morali i spati v Varaždinu jer više nemaš 0,0 promila. Baš si se lepo priredil.
Meni je pak bilo lepo v Varaždinu pa mi je bile tak sejeno. Sad, kak je bile tak je bile, sme se špancerali do jedanajeset vure, popili još dve litre domačega i jenu vodu a kak su si turistički kapaciteti v Varaždinu bili popunjeni smo spali pri «ŠOGORICA TURISTU». Več je prošla i dvanaesta vura a nisem mogel zaspati. Nekaj sem si premišlal kak su ti varaždinci dobri i sposobni ljudi, pak znaju delati turizma. Se skup me je došlo kak jena prometna kazna ali bar sme se zabavili i, saka čast, bile je kaj za videti.
– Jožek, jel spiš? – oglasi se onak umiljato moja Pepica
– Čuj, a jel bi mogel još jemput fest vudriti, onak, kak pri kovaču, pa makar bile i v šrek?
Sem ništ ni rekel, pak je mislila da spim.
Cifrasto Vas pozdravla Vaš pajdaš Joža z Slobodne Kralevske Varoši Križevci.
—
(Napomena: Tekst je objavljen u Varaždinskim vijestima na duplerici, 2004. godine)
Komentari su zatvoreni.